[size=32]امل بتنهار وهى شايفة مامتها قدامها مش بترد عليها
مش عارفة تتصل... مسكت التليفون واتصلت بايناس
الموبايل بيرن ... ومفيش رد
بتتصل تانى وهى بتحاول تفوق مامتها وهى بتعيط
امل"الو... مازن الحقنى ماما وقعت قدامى فجأة ومش بترد عليا... انا مش عارفة اتصرف واخويا مسافر... طيب حاضر هتصل اهو .. انت عارف العنوان ايوه تدخل الشارع ده على طول هتلاقى عمارة 15 فى الوش "
واول ما قفلت معاه اتصلت بالاسعاف
الاسعاف وصل وامل لسه لوحدها
وهما بيشيلوا مامتها كانت بتعيط وشبه منهارة
وصل لها مازن
مازن"متقلقيش ياامل ...ان شاءالله خير"
امل"انا مش عارفة حصل لها ايه... كانت بتكلمنى عادى"
مازن"هنشوف اهو"
خلال كلامهم كانت مامتها بقت فى الاسعاف
مازن"تعالى معايا فى العربية"
امل"لا انا هركب معاها "
مازن"ماشى... انا وراكم اهو متخافيش"
ايناس قاعدة فى الانتريه وعادل خارج من الحمام
عادل"انا نازل...مش عايزة حاجة"
ايناس بتبص له بعيون باردة ودموع متحجرة
راح ناحية الباب فعلا
عادل"مش هتقومى تبصى قبل ماافتح لاحسن حد يشوفنى"
قامت ايناس من مكانها بخطوات بطيئة
وقبل ماتفتح الباب
ايناس"فاضل ايام على الامتحانات... وبعدها تيجى تتقدم لى بقى"
عادل"اه طبعا طبعا... متقلقيش بس"
فتحت ايناس الباب وبصت بره
"مفيش حد"
مال عليها وباسها فى خدها بسرعة
"باى يا قمر"
امل ومازن فى المستشفى
امل بتعيط بصمت ومازن مش لاقى كلام يقوله يهديها بيه
والام بيعملوا لها فحوصات
مازن"انا هكلم ايناس يمكن مامتها تعرف حد هنا يوصى على مامتك ويهتموا بيها اكتر"
امل"ماشى بس انا اتصلت بيها مردتش مش عارفة ليه"
مازن"خلينا نجرب تانى يمكن مسمعتوش ولا حاجة"
امل"مازن انا بس عايزة اقولك حاجة"
مازن"قولى"
امل"عايزة اعرف حساب المستشفى هيكون ازاى يقدروا يعنى يستنوا لما اخويا ييجى ويحاسبهم...انا شايفة مستوى المستشفى هنا عالى"
مازن"متشيليش هم الفلوس"
امل"لا معلش هما بس يستنوا لحد مااخويا ييجى واكيد يتصرف"
مازن"يابنتى عيب عليكى الكلام ده... نطمن بس على مامتك الاول"
ومازن ماسك التليفون بيتصل بايناس
ايناس قاعدة مكانها على الكنبة وضامة ركبها لحضنها وسرحانة
رن الموبايل...اول ما رن
افتكرت والموبايل بيرن وهى واقفة جنب الباب بعد ما جه عادل
وهى بين احضانه... وبتحاول تقاومه بضعف واستسلام
حركت راسها بحركة لا ارادية كأنها بتطرد الفكرة دى من راسها
ومسكت الموبايل اللى كان لسه بيرن
ايناس"الو... ازيك يامازن"
مازن"ايناس انتى فين "
ايناس"انا فى البيت ليه؟؟"
مازن"امل اتصلت بيكى كتير وانتى مردتيش"
ايناس"مسمعتوش...وانت عرفت منين هو انت كلمت امل"
مازن"امل كلمتنى مامتها تعبت اوى واحنا فى المستشفى دلوقتى"
قام مازن من جنب امل... وراح بعيد شوية
مازن"هينفع تيجى ياايناس امل لوحدها وواضح ان مالهاش حد يبقى معاها وكمان لو مامتك تعرف حد هنا"
وقاطعته ايناس
"انا جاية حاضر...انتوا في مستشفى ايه... طيب طيب مسافة السكة"
قفلت معاه ولسه داخلة اوضتها جرس الباب ضرب
اتخضت...راحت بخطوات بطيئة وبصت من العين
شافت بتاع الديلفرى... فتحت حاسبته واخدت الاكل حطته على الترابيزة القريبة منها ودخلت تلبس
خرجت مامة امل من الفحوصات وهى محطوط لها التنفس الصناعى... جريت عليها امل واتطمنت انها عايشة
وسألت الممرضات وهما ماشيين بالسرير
امل"هى كويسة"
الممرضه"الدكتور قال لازم تدخل العناية المركزة"
مازن"هسأل الدكتور"
امل"هروح انا مع ماما"
الممرضة"ممنوع... الزيارة من الساعة2 للساعة 4 بس"
امل"مينفعش اسيبها"
الممرضة"دى عناية مركزة ومينفعش يقعد معاها مرافق"
بصت امل لمازن
مازن"طيب هى عايزة تطمن على مامتها"
امل"تقدرى تكلميها دلوقتى وتيجى بكرة فى معاد الزيارة"
الام واضح عليها الاجهاد وبتحاول تطمن امل
امل"ماما انتى كويسة.... متخافيش هتبقى كويسة ان شاءالله"
بصت الام لمازن فى تساؤل
امل"ده مازن زميلى... معرفتش اتصرف لما وقعتى هو اللى جابنا هنا"
مازن"سلامتك ياطنط ان شاءالله تقومى بالسلامة"
كان الحوار ده كله وهما ماشيين لحد ماوصلوا للعناية المركزة وكانت فى نفس الدور
الممرضه"خلاص ياجماعة تقدروا تيجوا بكرة"
مالت امل على مامتها وباستها وهى بتعيط
طبطبت عليها مامتها وابتسمت لها علشان تطمنها
بعد مادخلت الام العناية المركزة... راحت امل ومازن للدكتور اللى قالهم انها ازمة قلبية ومحتاجة كام يوم فى العناية المركزة وهتبقى كويسة
مازن"انا هتصل بايناس اقولها متجيش بقى وانا اوصلك البيت"
امل"طيب... هشوف الحسابات"
مازن"طيب انا جاى معاكى وبعدين اكلم ايناس"
فى الحسابات... اتفاجئت ان حساب الفحوصات واول ليلة فى العناية المركزة 800 جنيه ويبقى الحساب لسه مفتوح
امل لموظف الحسابات
امل"انا ممكن ادفع 200 دلوقتى مش كده"
"والله ياانسة اقل حاجة ممكن تسيبى 500 جنيه والباقى يتضاف على
الفاتورة... اسف ده نظام مستشفى"
امل"بس ...انا.."
مازن"تعالى ياامل عايزك"
واخدها بعيد شوية
مازن"بصى انا معايا فلوس خدى دلوقتى وابقى اخدهم بعدين"
واخدت امل 300 جنيه على ال200 اللى معاها ودفعت المبلغ ده تحت الحساب لحد مااخوها ييجى
امل"انا كل ده نسيت اتصل بابراهيم من لبختى"
مازن"طيب كلميه وطمنيه... بس لو جه ولقانى هيعملك مشكلة طبعا"
امل"هو مسافر عند قرايب مراته... وانا بجد مش عارفة اشكرك ازاى انك نجدتنى بس مش هقدر اقول لابراهيم يشكرك لانه هيسيب المهم وماما ويمسك فى مين ده وتكلميه ليه"
مازن"مفهوم طبعا...وبعدين شكرا ايه بس هو فيه شكر بين الاخوات انتى مش عارفة انى بعتبركم انتى وايناس وايمن اخواتى"
امل"عارفة والله يامازن وانا كمان بعتبركم اخواتى"
ايناس بتتصل اهى شكلها وصلت
مازن"ايوه ياايناس... لا خليكى متطلعيش احنا نازلين"
قدام المستشفى... وعند عربية ايناس
ايناس"كل ده حصل فجأة كده"
امل"الحمدلله انها جت على قد كده"
مازن"ايناس...مامتك متعرفش حد هنا يوصى على مامة امل فى الاهتمام يعنى وكده"
ايناس"متقلقش انا هشوف ماما وبابا واكيد هيتصرفوا"
ورن موبايل مازن... ورد وهما لسه واقفين
مازن"الو.. اه فى مشوار بس وجاى على طول لالالا ياعادل متمشيش انا جاى البيت على طول اهو"
سمعت ايناس اسم عادل مشاعر كتير حست بيها
حب... حنين... قلق... ندم
مازن"انا ماشى بقى يا بنات عايزين حاجة... انا هبقى احكى لايمن اللى حصل بس انا مرضيتش اقوله لانه بيتعب فى الشغل وقلت انا اسِد مكانه"
امل"ربنا يخليك يامازن بجد متشكرة اوى انا هفضل شايلة جميلك ده طول عمرى"
مازن"تانى هو فيه جمايل بيننا"
امل"بجد انا كنت متلخبطة ولولا لنك قلتلى اتصل بالاسعاف يمكن مكناش لحقنا ماما"
مازن"متقوليش كده...ربنا يشفيها ان شاءالله...سلام"
ومشى مازن... وركبت امل مع ايناس
ايناس"تعالى باتى معايا ياامل بدل ماتباتى لوحدك"
امل"لا معلش مش هينفع علشان لما ابراهيم ييجى يلاقينى فى البيت"
ايناس"يعنى مش هتخافى "
امل"هخاف بس هعمل ايه بقى ربنا يخليلى ماما وترجع البيت بالسلامة "
ايناس"بصى تعالى نروح لماما العيادة واستأذنها انى ابات عندك علشان مش عايزة اسيك لوحدك"
امل"ربنا يخليكم ليا انا مش عارفة من غيركم كنت عملت ايه"
فى بيت امل... والساعة وصلت 4 الفجر
ايناس"انا اول مرة احب ياامل وبحبه اوى"
امل"بس كل الفترة دى ولا باين عليكم... بس عايزة اقولك حاجة ومتزعليش منى"
ايناس"قولى"
امل"كل لما بتقوليله على الخطوبة مش بيرد عليكى رد واضح وكمان انتى اللى بتبدأى وهو مش بيبدأ يعنى شوفى مثلا ايمن بيشتغل وبيدرس وكل ده علشان اللى بيحبها فاكرة لما عرفنا عليها وقال خطيبتى...انتى بقى عادل بيعمل ايه يطمنك بيه"
ايناس"ماهو لسه مخلصش دراسة"
امل"بصى بدل كل اللى بينكم تليفونات وكلام اديله فرصة لحد ما يخلص ولو لقيتيه معملش حاجة اقطعى علاقتك بيه"
ايناس"مش تليفونات وبس"
امل"اومال ايه"
قالتها امل بخضة
ايناس"اقصد يعنى ساعات كنا بنخرج مع بعض"
امل"متخرجيش معاه تانى وشوفى نيته ايه علشان تفضلى غالية فى عينه "
كلام امل ببراءة بس كان بيوجع ايناس... اللى مقدرتش تقولها اكتر من ان اللى بينهم حب برئ
ايناس"انا هنام بقى ياامل تصبحى على خير وبكرة بدرى هروح معلش علشان بتحرج اوى من اخوكى.. هو هييجى الصبح زى ماقالك"
امل"اه قال الصبح ومتشكرة اوى ياايناس على وقفتك جنبى"
ايناس فى بيتها تانى يوم... وبتكلم عادل فى الموبايل
ايناس"كده ياعادل متكلمنيش امبارح خالص"
عادل"معلش ياحبيبتى...بقولك ايه انتى لوحدك صح...اعدى عليكى شوية"
ايناس"لا... انا ندمانة اوى من اللى حصل بينا امبارح"
عادل"ليه يعنى هو حصل ايه"
ايناس"انت بتتكلم كأنه عادى ومحصلش حاجة"
عادل"ايوه عادى...اللى حصل بيننا ده بيحصل بين اى اتنين بيحبوا بعض"
ايناس"لا ياعادل مش عادى ولا اللى بيحبوا بعض لازم يحصل بينهم حاجات من دى"
عادل"متكبريش الموضوع اهم حاجة انتى سليمة زى ماانتى ... وبدل بنحب بعض يبقى مفيش بيننا اى حواجز ولا حدود... ولا كسوف" [/size]
الرئيسية 
