السلام عليكم و رحمة الله و بركاته
شحالكم يا شباب .. مشتاقين لكم والله ..
ادخل المنتدى تقريبا بشكل شبه يومي .. لكن شبكات التواصل الاجتماعي زرعت فينا كسل الرد و الكتابة .. و صار اللابتوب فقط لمشاهدة الافلام .. و لا والله حتى اليوتيوب قمت اشوفه من التيلفون ..
على العموم
انا صارلي اكثر من سنة اتريا معشوقتي BMW X5 موديل 2014 ..
و لكن يوم وصلت وقعت علي الصدمة .. سياره جميلة من الامام لكن بشعة جدا من الخلف + الداخلية السوداء الكئيبة المكررة + السعر الناري .. ثمانية سلندر بـ 420 الف و الستة سلندر بـ 335 الف .. و بصراحه ما تستاهل هذا السعر ابدا ..
و عليه ..
قررت اني اتجه الى الوكالات الاخرى .. و دعوني اشارككم تجربتي و دوختي
مرسيدس :
ML350 AMG: سياره جميلة و أنيقة و لكن طرازها الداخل قديم و لم يعجبني ابدا .. سعره حوالي 265 الف درهم
CLS 350 : من اجمل السيارات في فئتها .. و لكن يوم ركبتها و نزلت منها طاح عقالي مرتين .. ما يناسب طولي + سعرها المبالغ .. 385 الف درهم
A250 AMG: الاجمل في فئتها و لكن على قولة ربيعي بتسوقها سنتين و بتمل .. لانها سياره للمشاوير الصغيره فقط ..
E300 AMG: من اجمل السيارات في فئتها بصراحة مع اني متعصب للـ BMW الا اني اقول هاي السياره اللي الواحد يستاهل ياخذها و هيه الاقرب الى قلبي الان
ولكن !! و اخ ولكن .. السياره قيمتها 267500 درهم و مع الخصم يمكن يعطوني بـ 263 الف ..
مكينتها 3.5 لتر تولد 252 حصان فقط ! و بصراحة يوم سقتها كان ادائها متواضع جدا .. هيه تنزل فئة ثانيه E 350 وتولد 306 حصان و فيها تبريد كراسي .. بس السيارة سعرها اغلى بـ 20 الف درهم فقط لهذتين الصفتين ! و انا ما عندي مشكله باخذها .. بس ماشي ستوك و لا طلبية خاصة و اتريا 3 شهور
+ ضمان السيارة 3 سنين فقط !! و سيرفس الى 45 الف كيلو
BMW:
الفئة الخامسة: الشكل الحالي صارله فتره نازل .. اعتقد من 2010 .. يعني من 4 سنين + ضمانها سنتين بس
الفئة السادسة جراند كوبي: منافسة CLS و لكن شكلهاا مقبول جدآ .. السعر للـ 640 حوالي 345 الف
Audi:
Q7: جميلة و لكن ظالمينها في الديزاين الداخلي و تشعر ان السياره موديل 2004 و ليست 2014 .. 265 الف مع كت S-Line
A7: اقوى المنافسين للـ CLS و لكن واجهت نفس المشكلة بصعوبة بركوب السيارة و الخروج منها و سعر الستة سلندر هو 310 الف درهم
ضمانهم 3 سنين او 100 الف و بدون عقد صيانة
Jaguar:
XF: سياره دخلت قلبي بقوة و فاجئتني بصراحة .. جميلة من الخارج و راقية من الداخل و تحمل مكينة جباره 3.0 سوبر جارج يولد 340 حصان .. سويت تجربة للسيارة و ماشاء الله عليها من اقوى السيارات اللي سقتها. عجيبة
سعرها مع البودي كت و الجناح و الزوايد حوالي 255 الف درهم
اللي حمسني زيادة هو ضمانها 5 سنين او 250 الف كيلو !! و عقد صيانة 3 سنين او 60 الف كيلو .
اللي مخوفني بان شكل السياره قديم و مسوين لها فيس لفت من 4 سنين .. واعتقد راح يكون تغيير جذري بعد سنة او سنتين
انا دفعت عربون 5 الاف و لكن بعدني متردد .. شكلي بسحبها
VW:
Golf GTI : سياره غنية عن التعريف و ولد اختي عنده اياها موديل 2014 و السياره 10/10 .. بس يقولك اترياها 4 شهور
..
Touarq R Line: جدا جميلة السياره و احلى من الطوارق العادية .. لكن عندنا طوارق 2012 في البيت .. ما يحتاي اخذ وحده ثانيه
Infiniti
Q50: من شفتها في معرض دبي للسيارات و انا كل يوم اقول باخذها .. لكن للاسف الشديد اليوم رحت الوكالة و التوقعات بوصولها في اواخر شهر ابريل .. يعني اول دفعة بعد 3 شهور .. سعرها يبدا بـ 160 الف و ينتهي بالفئة الرياضية بحوالي 200 الف درهم
M37: الفئة غريبه شوي و منافسينها ابعد منها .. بس قلت خلني اسوي لها تجربة يمكن تعيبني و باجر ان شاء الله بجربها .. و السياره سوولها فيس لفت في 2011 .. و المكينة الكبيرة اللي هي 45 او 56 ما قاموا اييبونها هني
Lexus
GS350-F: السيارة جميلة من الخارج و بالذات مع زوايد الـ F باللون الرمادي و الرنجات Smoke .. سويت لها تجربة اليوم .. احس بعدني اسوق الكامري مالتي 2004 لكن مع داش بورد يديد .. اسف يا محبي اللكزس بس هذا رايي .. و الاسوأ من الناحية الجمالية الداخلية في فئتها .. بعدها اتحس فيها اشياء بداية .. يا جماعة حتى مثبت السرعة شرات مال الاف جي مالتي اللي موديلها 2009
اللي مشجع الموضوع ان فيها كل شي و تبريد الكراسي (اهم شي) و ضمانها 5 سنين مفتوح بدون عقد صيانة و قيمتها بعد الخصم الاقوى شي هو 245 الف درهم .
Massarati
ghibli: سيارة واضحة من سياسة مازاراتي ببيع اكثر عدد من السيارات و السياره داخليتها عادية جدا (رأيي الشخصي عند زيارتي للمعرض امس)
Porsche
Cayenne: باختصار .. ما عيبتني
Ford
ما حصلت شي يناسبني
Lincolin
ما حصلت شي يناسبني
Caddilac
ما حصلت شي يناسبني و حتى الـ CTS ما زلت اشوف الجيل اللي قبله كان احلى
ولا حد يقولي استيشن ولا نيسان لاني بزغده
الميزانية 280 الف
لين 300 معقولة
باختصار .. اللي عيبوني لين الحين
E 300 AMG Kit
وصول مرسيدس E-Class اي كلاس 2014 إلى السعودية Jaguar XF
Jaguar Middle East - XF Gallery Lexus GS350 F Sport
2014 Lexus GS 350 - Luxury Sedan | Lexus.com يالله يا شباب عطوني ارائكم
حتى لو سيايير خارج اللستة .. او اي سياره ما خطرت على بالي ..
موعد الشراء باذن الله تعالى هو بعد 10 ايام ..
الرئيسية 
