[size=32]طول الطريق وامل متحمسة وبتفكر فى حلمها واسماء الابواب اللى بتتخيلها والافكار اللى ممكن تنفذها
واول ما وصلت البيت
الام"اتأخرتى يا امل"
امل"متأخرتش ولا حاجة ياماما"
الام"اخوكى اتصل وسأل عليكى"
امل"ياماما مش معقول كده بقى انا بخاف الطريق يكون زحمة
واتاخر من كلامكم ده... مش معقول كده بقى"
الام"ياامل انا مش عايزة مشاكل ... انا وقفت جنبك وخليتك تدخلى الكلية اللى انتى عايزاها وانتى عارفة ان اخوكى مكنش موافق... متخلينيش اندم"
امل"ياماما انا عايزة اعرف بس انتوا خايفين من ايه"
الام"خايفين عليكى من اللى بنسمع عنه الدنيا بقت وحشة اوى ياامل وانتى طول عمرك قطة مغمضة يعنى مش هتعرفى تفرقى الكويس من الوحش"
امل"متخافيش ياماما"
مازن فى بيته ومعاه عادل
والاتنين بيدخنوا والبيت كله دخان
عادل"شايفك النهاردة مندمج مع دفعتك الجديدة"
مازن"علشان العملى انا اول مرة اتكلم معاهم"
عادل"ما انا فاهم... بس ايناس دى عجبتنى اوى"
مازن"عجبتك ازاى ياعادل... معتقدش انها النوع اللى بتفكر فيه"
عادل"كله بالكلمة الحلوة بييجى... متقلقش انت بس"
مازن"بلاش ياعادل"
عادل"عجبتك؟؟؟"
مازن"لا مش دى الفكرة... انا مش عايز اكون طرف فى حاجة من دى"
عادل"وانت طرف ازاى بس"
مازن"مش انا سبب التعارف"
عادل"متقلقش انت بس"
ايمن رجع من شغله بالليل
كانت مامته قاعدة بتخيط على ماكينتها
دخل اوضته... واتصل بشروق
دخلت عليه مامته وهو بيتكلم
الام"جهزت لك العشا"
رد عليها وهو بيتكلم
ايمن"حاضر ياماما... جاى اهو"
وخرجت الام وبعد شوية صغيرين خرج ايمن من اوضته
وهو بيتعشا
ايمن"مش هتاكلى معايا"
الام"لا انا اتعشيت الحمدلله... بس عايزة اتكلم معاك"
ايمن"خير ياماما"
وضحكت له وهى بتتكلم
"حاسة انك متغير... حاجة شاغلاك... حاجة انا معرفهاش"
وفهم ايمن تلميحها... وعمل نفسه مش اخد باله وكمل أكل
ايمن"مشغول من الكلية والشغل "
الام"بس؟؟"
واول ما جت عينيهم فى عينين بعض...ابتسم ايمن
ايمن"انتى دايما فاهمانى كده"
الام"اومال افهم مين غيرك...قولى زميلتك فى الكلية"
ايمن"لا... واحدة تانية"
الام"عرفتها منين"
ايمن"اعرفها من زمااااااااااااان"
الام"من ورايا"
ايمن"لا طبعا...انا اعرفها بس عمرى ماكلمتها الا قريب"
الام"مين هى؟"
ايمن"شروق"
الام"شروق جارتنا ولا واحدة تانية"
ايمن"لا هى... ايه رأيك؟؟"
الام"ودى عايزة كلام بنت مؤدبة وبنت ناس طيبين... انت كلمتها"
"ايمناه... وفهمتها انى داخل جد وعايز ارتبط بيها فعلا علشان كده فيه بيننا كلام "
الام"بس..."
ايمن"بس ايه ياماما؟؟"
الام"لالا مفيش"
ايمن"قوليلى فى ايه"
الام"كنت بفكر هى هتستناك يعنى لحد ماتخلص"
ايمن"دى لسه فى تالتة ثانوى وانا قدامى سنتين كمان واخلص
مش كتير"
الام"طيب ... بس البنات يعنى بتتخطب بدرى وشروق حلوة وبنت
ناس وممكن ييجى نصيبها فى اى وقت انت ضامن انها هتستناك...انا خايفة انت تتعلق بيها وبعدين ميكونش فيه نصيب"
سرح ايمن فى كلام مامته... مفكرش فى كلامها قبل كده بس هى فعلا لفتت نظره هل ممكن بعد الحب ده تتخطب لواحد تانى... ماهو ياما سمع حكايات حب مكملتش
الام"انت بطلت تاكل ليه؟؟ زعلت منى"
ايمن"لا طبعا مزعلتش بس سرحت"
الام"بقولك ايه ولا يكون عندك فِكر... انت بس شد حيلك كده وحاول تحوش وانا اللى هقدر عليه انى اوفره هوفره... علشان اول ماتخلص اقدر اخطبهالك بقلب جامد"
ايمن"ربنا يخليكى ليا"
الام"وبقولك ايه... اوعى تدى فلوس لابوك تانى ده بيصرفها فى القمار وحرام شقاك يضيع فى الحرام كده... مش كفاية انت بتصرف على نفسك"
ايمن"انا اديته علشان مش عايزين مشاكل"
الام"لو سيبته ياخد منك مش هيخلى حيلتك حاجة... متديلوش
تانى"
ايمن"حاضر"
كل يوم كانوا ال4 بيتجمعوا مع بعض بين المحاضرات لتقسيم الادوار او لصياغة الموضوعات وتحضيرها
عادل كان متواجد معاهم كل ما بيشوفهم
كانت نظراته لايناس غيرهم كلهم... وحست ايناس بنظراته
كانت بتفرح باهتمامه بيها وهما قاعدين مع بعض
كانت اول ما بتوصل الكلية بتدور عليه بعينيها
واول ما تشوفه... تحس انها مطمنة وهى شايفاه
يوم سيكشن الصحافة... وبعد المعيد ما شاف المجلات
استوقفته مجلتهم للتطور اللى شافه حصل فى الاسبوع
"مجلتكم رغم انها مش احسن مجلة بس بالمقارنة بمجلة الاسبوع اللى فات اقدر اقولكم ان ده تطور كبير واحييكم عليه... شغلكم حلو وياريت تستمروا على كده"
فرحة كبيرة تملكتهم... ورغبة اكتر فى النجاح
وبعد السيكشن بدأوا يقسموا شغل المجلة الجاية علشان ميضيعوش وقت
كانوا قاعدين مع بعض ال4... لما رن موبايل امل
امل"الو..."
ابراهيم"ايوه يا هانم...انتى فين لحد دلوقتى"
امل"فى الكلية"
ابراهيم"انتى مخلصة محاضراتك من ساعة ونص كل ده فى الكلية بتعملى ايه؟... اوعى تكونى اتلميتى على شلة بايظة من بتوع الايام دى"
بصت امل حواليها.... هى قاعدة وسط مجموعة بس مش بايظة
بس هتقدر تقول كده لابراهيم
لو شافها ومعاها ايمن ومازن وايناس بمظهرها ده هيقول ايه
ابراهيم"انتى مبترديش ليه"
امل"انا لسه مخلصة المحاضرات حالا"
ابراهيم"ازاى يعنى"
امل"اصل الجدول حصل فيه تعديلات وبقى فيه سكاشن للعملى بمواعيد تانية خالص.... هجيبلك على اخر الاسبوع الجدول الجديد علشان يكون بقى ثابت وميتغيرش"
ابراهيم"اما نشوف اخرتها معاكى"
بعد ماقفلت امل... فكرت فى كذبتها
وياترى تقول الحقيقة وهيقدر... ولا تستمر فى الكذب وهى عارفة انها مش بتعمل حاجة غلط بس اكيد هيمنعها من الاختلاط بيهم
وهى حاسة انها لقيت نفسها وسطهم
تفكيرهم قريب من بعض.... اهتماماتهم واحدة
مستواهم الدراسى متقارب... حلمهم واحد وبيكملوا بعض
ايناس وهى راجعة من الكلية... راحت تشترى اكل وهى فى طريقها للبيت... وهى راجعة تركب عربيتها... لقيت عادل واقف جنب العربية
ايناس"عادل؟؟"
عادل"ممكن اعزمك على الغدا"
ايناس"انت.... انا..."
وارتبكت ومبقتش عارفة ترد عليه
عادل"عايز اقعد معاكى شوية لوحدنا .... ممكن"
فرحت من كلامه... وفرحت اكتر اول ما شافته
عادل"ها... يالا "
ورجعت تانى للمطعم اللى جابت منه الاكل
وقعدوا مع بعض... كانت ساكتة خالص
عادل"انا من اول ماشفتك وانا اتشديتلك اوى ياايناس... انتى
عملتى فيا ايه"
ايناس"معملتش حاجة"
عادل"لا انتى عملتى حاجات كتير... انتى خطفتى قلبى من اول نظرة"
ايناس فرحانة وبتحاول تدارى فرحتها... نفسها تقوله وانا كمان بس كانت مكسوفة مش عارفة تقوله ايه؟؟ عايزاه يقول تانى
ايناس"احنا لسه عارفين بعض من كام يوم"
عادل"بس كأنى اعرفك من سنين...الحب مش بالوقت الحب احساس وانا حاسس بيكى اوى ياترى انتى كمان حاسة بيا"
ايناس"احنا منعرفش بعض ياعادل"
عادل"هنعرف بعض اكيد... بس الحب مش محتاج اكتر من انى بحبك وانتى كمان تكونى بتحبينى"
مد ايده لمس ايديها... سحبت ايدها بسرعة ...ارتبكت...
ايناس"انا لازم اقوم"
عادل"انا عايز اتعرف عليكى اكتر ياايناس"
ايناس"ان شاءالله"
قالتها وهى ماشية
عادل"طيب هاتى رقم تليفونك"
قالت له رقمها.... ومشيت بسرعة وهو قعد مكانه
ركبت عربيتها وابتسامة وفرحة كبيرة تملكتها
حاسة ان قلبها هيطير من مكانه
عادل قاعد مبتسم ابتسامة المنتصر
مسك موبايله... وكتب رسالة
وهى فى العربية... رن موبايلها برسالة
شافت اسم عادل... ورسالة مكتوب فيها
"بحبك" [/size]
الرئيسية 
ً لك