[size=32]انتبهوا كلهم علشان يشوفوا مازن هيقول ايه...وكمل
"الاجازة اللى سافرت فيها نفعتنى اوى وخلتنى واحد تانى احسن من الاول"
ايمن"انت مكنتش وحش علشان تفرح كده"
مازن'' لا كنت وحش اوى ... المشكلة اللى حصلت بينى وبين عادل قبل مااسافر خلتنا نبعد عن بعض وده كان احسن ليا ولما سافرت كان احسن واحسن"
ايناس"هو عمل معاك مشاكل احنا منعرفهاش"
مازن"لا خناقة فى التليفون وانا خوفته وبعدها متصلش تانى وانا كنت عارف انه جبان...متقلقيش مش دى المشكلة"
امل"ايه المشكلة طيب"
مازن"هى مش مشكلة هى فكرة "
وانتبهوا كلهم اكتر وردوا
"ايه\\ فكرة ايه\\ قول الفكرة"
مازن"حلمنا... نكمل حلمنا بس متبقاش مجلة حائط"
ايمن"تبقى ايه"
مازن"اعداد ننشرها اسبوعيا بس على النت ونعملها bdf واللى هيتابعنا هيحملها ونعملها صفحة ع الفيس بوك ونتوسع بدل ماالمجلة بيشوفها اللى فى الجامعة بس يشوفها اى حد فى اى حتة"
وبصوا كلهم لبعض مستحسنين الفكرة
ايمن"يابن الايه... جبتها ازاى الفكرة دى"
مازن"طول عمرى افكارى جامدة"
ايناس"هى من ناحية جامدة ...جامدة"
مازن"امل وشروق...ايه ليه ساكتين كده"
شروق"انا مع ايمن فى اى حاجة"
مازن"هاااا وانتى ياامل"
امل"انا سرحت فى حلمنا...معاكم طبعا"
ايناس"ياابو قلب حديد ياامل ياجااااااامد"
ايمن"بس مش هنقدر احنا ال5 على المجلة"
امل"اللى عنده موضوعات حلوة وعايز يشارك معانا يشارك"
ايناس"صح واكيد هنلاقى كتير عايزين يشاركوا معانا"
ايمن"احنا نبدأ الاسبوع ده بمجلة حائط ونكتب فيها اننا من الاسبوع اللى بعده هتبقى الكترونى ونعلن ان اللى عايز يشاركنا يبعتلنا"
امل"تمام ونعمل ايميل للمجلة نتابع منه موضوعات المشتركين"
ايناس"تمام اوى كده.. شكلنا كده مفيش محاضرات النهاردة انتوا قاعدين ولا ايه"
امل"لا انا همشى بقى"
ايناس"طيب يالا بينا.. سلام ياجماعة"
ومشيوا ايناس وامل... وهما فى العربية
امل"اخبار بنت اختك ايه يا ايناس"
ايناس"الحمدلله بقت عسولة خالص بس مش بشوفها كتير"
امل"هو لسه بيضايقك"
ايناس"انا عملت زى ماقلتى ومرة وهما عندنا فى البيت دخلى المطبخ وبيقولى عايز اتكلم معاكى ضرورى... قمت مزعقة وقلت له هقول لبابا على عمايلك دى وهو يتصرف معاك.. من ساعتها بقى بطل ييجى عندنا الحمدلله"
امل"احسن اللى زى ده بيبقى جبان زيه زى عادل لو خفتى منه يزودها لو اديتيله على دماغه يبعد عنك"
ايناس"خلاص اتعلمت الدرس الحمدلله"
امل وهى بتفتح الباب بالمفتاح
سمعت صوت ابراهيم... وحد تانى متعرفوش
كملت فتح الباب... كان ابراهيم قاعد بيتغدا مع واحد تانى
بعد ما القت التحية دخلت على مامتها فى المطبخ
امل"مين ده ياماما"
الام"واحد صاحب اخوكى"
امل"وعندنا ليه؟؟"
الام"هو يعرف اخوكى من الشغل بس من اسكندرية ولما اخوكى بيروح هناك اسامة ده بيعزمه وبيرحب بيه"
امل"ومعزموش فى بيته ليه"
الام"ماانتى عارفة الفت ملبوخة بالعيال ولا فاضية تعزم ولا حاجة واخوكى اتصل بيا وقالى اجهز غداء"
امل"طيب مش هنتغدا احنا بقى"
الام"غيرى هدومك وتعالى نتغدا هنا لحد ما يخلصوا"
امل ومامتها لما اتغدوا... دخل ابراهيم عليهم
ابراهيم"ماما اعملى الشاى...وابقى هاتيه انتى بلاش امل"
الام"حاضر"
ورن تليفون البيت... وصوت ابراهيم بينادى على مامته
ابراهيم"ماما تعالى كلمى ام نجوى"
الام"يوووووه هتقعد ترغى ياختى وانا مش فاضية"
امل"اقول لابراهيم يقولها انك نايمة"
الام"لالا لاحسن تزعل...لو طولت ومعرفتش اقفل معاها ابقى ودى الشاى لاخوكى"
امل"حاضر"
ووقفت امل تعمل المطبخ... والشاى خلص واتصب ومامتها لسه بتتكلم...واضطرت امل تطلع لهم الشاى قبل ما يبرد
فى الكلية... وفى امتحانات اخر السنة
بعد الامتحان واقفين الاربعة مع بعض
ايناس"على فكرة احنا كده هنقعد شهر من غير المجلة ماتنزل وانا خايفة الناس تنسانا"
امل"هنعمل ايه بس ضغط الامتحانات واحنا شايلين مواد من السنة اللى فاتت يعنى هنذاكر ولا ننزل المجلة"
مازن"مااحنا هيبقى عندنا الصيف ننزل المجلة ونرجع نشاطنا تانى اقوى من الاول"
ايناس"بس امل فى الصيف مش بتعرف تنزل كتير علشان اخوها انما فى الدراسة عارفين نشتغل"
مازن"الا امل... امل مهمة جدا وانا بحب شغلها تصويرها ممتاز "
ايناس"ماتحاولى ياامل تبقى حتى تنزلى الصبح ونعمل شغلنا واخوكى بيبقى فى شغله"
امل"بس ساعات بيبقوا قاعدين عندنا ومراته بتبقى موجودة واخاف لو نزلت كتير يعملى مشكلة"
ايمن"ماتقوليله عندك تدريب فى الصيف تبع الكلية واليوم اللى تكونى هتنزلى فيه قوليله انه تدريب وحاولى تخليها يومين تلاتة بس فى الاسبوع"
مازن"حلوة فكرة ايمن... واحنا مينفعش نشتغل من غيرك"
امل"اوك ...ربنا يستر"
فى بيت مازن مامته وباباه قاعدين بيتفرجوا على التليفزيون
ومازن راجع من بره
الام"مازن كنت فين طول النهار"
مازن"كنت مع اصحابى بنحتفل بالنتيجة"
الاب"باين ان اصحابك دول كويسين من ساعة ماعرفتهم وانت بتنجح وانا فرحان بيك"
الام"ها ياحبيبى عايز ايه هدية النجاح"
مازن"اللى انا عايزه هتجيبهولى"
الام"طبعا"
مازن"وعد"
الاب"شكلك طمعان فى حاجة كبيرة"
مازن"بصراحة اه"
الام" ايه هى... مفيش حاجة تغلى عليك"
مازن"عايز شقة فى مكان حلو"
واستغرب الام والاب وبصوا لبعض وردوا الاتنين
"ليه"
ايمن هو ومامته بعد ما رجع من شغله
ايمن"ماما بقولك ايه...مش كفاية كده بقى"
الام"كفاية ايه"
ايمن"عايز اخطب شروق"
الام"الف بركة ياحبيبى... انت جاهز يعنى"
ايمن"حاليا ممكن نقرا فاتحة بدبلتين وربنا يسهل بعد كده واهو اللى حوشته معقول بس نخلى الشبكة وكتب الكتاب السنة الجاية لما اخلص ولحد ماهى تخلص يكون ربنا فرجها وكونت فلوس للعفش وابقى اشوف اى شقة ايجار على قدنا"
الام"انت مرتب كل حاجة ما شاءالله عليك"
ايمن"انا بقالى سنين بشتغل علشان ايه مش علشان اصرف على نفسى وعلشان اقدر اخطب شروق"
الام"بس تفتكر اهلها هيوافقوا على كل اللى انت قلته ده من غير شروط"
امل قاعدة فى اوضتها بتشتغل على الكمبيوتر
دخلت عليها مامتها وهى فرحانة
الام"مبروك ياحبيبتى الف مبروك"
امل"الله يبارك فيكى ياماما...ماانتى باركتيلى الضهر لما رجعت"
الام"انا مش بباركلك على النتيجة بس"
امل"اومال على ايه"
الام"اسامة خطبك"
امل"اسامة مين"
الام"صاحب اخوكى اللى كان اتغدا عندنا قبل كده"
امل"وهو يعرفنى منين"
الام"ده اخوكى طاير م الفرحة وبيشَكر فيه اوى وقال ييجى هو واهله يوم الجمعة"
امل"هو ايه الهبل ده... ييجى فين هو واهله من غير مااعرفه اصلا"
الام"ماهو جاى علشان تشوفيه وعلشان اهله يشوفوكى"
امل"ماما بلاش استعجال... انا معرفوش"
الام"استعجال ايه.. ده شاب كويس وابن ناس وجاهز وشقته جاهزة وعايز يناسب اخوكى واخوكى يعرفه من فترة كبيرة وعارف اخلاقه ومتدين زينا وكمان مبسوط هو واهله"
امل"معرفوش ياماما ازاى كده بس"
الام"بكرة تعرفيه... بقولك ايه بقى مش معنى انى بوافقك على حاجات كتير انى هوافقك على كلامك ده... العريس كويس وابن ناس واخوكى يعرفه وهنبقى مطمنين عليكى... واحنا نعرف اكتر منك بكرة تعرفيه وتاخدى عليه وهتفتكرى كلامى ده كويس"[/size]
الرئيسية 
