[size=32]
المعيد"اتفضلوا يا جماعة .... استنوا انتوا"
وبدأ كل الموجودين فى الانصراف
وال4 مستنيين لما يمشوا
المعيد"مين اللى عمل التحقيق ده"
وردوا كلهم " احنا\\ كلنا \\ عملناه مع بعض"
المعيد"تحقيق هايل وخسارة يتحط فى مجلة حائط هنا فى الكلية... انا هنشره لكم فى الجريدة اللى بشتغل فيها.. تحقيق زى ده يقدمكم كتير فى مجالكم"
ونظرات السعادة كانوا بيتبادلوها مع بعض...وابتسامات فرحة كبيرة... حسوا باولى خطوات النجاح
المعيد"بس انتوا متأكدين من كل المعلومات دى علشان له حق الرد"
ايناس"طبعا متأكدين"
المعيد"هيتنشر فى اول عدد جاى ان شاءالله لو لحقت عدد بكرة هيتنشر وبأسمائكم... معاكم التحقيق مكتوب فى ورق عادى"
شكروه وهما فى غاية السعادة... ومشى بعد مااخد التحقيق معاه بالصور
تانى يوم كان التحقيق بتاعهم منشور فى الجريدة
ولاول مرة يتنشر حاجة باسمهم
كانوا فى غاية السعادة وكل اصحابهم بيقولوا لهم رايهم فى التحقيق
وكل واحد فيهم قال لاهله الا امل خافت ابراهيم يعرف يمنعها من الكلية او يضايقها...وقالت لمامتها بس
وزادت فرحتهم لما اتقبض على الدكتور واتقفلت العيادة
خلص التيرم الاول... ورجعوا بعد الاجازة
كانوا حاسين بحاجة ناقصة وهى ان مفيش مجلة
بس كانوا اتعودوا على بعض وفضلوا اصحاب ومنفصلوش عن بعض بعد الاجازة
وفى يوم وهما قاعدين مع بعض بين المحاضرات
جم عليهم مجموعة من الطلبة والطالبات..حوالى 4 مع بعض
وسألهم واحد منهم
"هى ليه مجلة حلمنا توقفت ومبقيتوش تعملوها"
ايمن"دى كانت عملى عندنا فى التيرم الاول وخلاص خلصنا"
واحد تانى من الطلبة"خسارة احنا كنا بنتابعها كل اسبوع ...موضوعاتكم حلوة اوى ومش احنا بس اللى كنا بنتابع ده فيه غيرنا كتير"
ايناس"دى حاجة تفرحنا ان كان لينا متابعين بس خلاص خلصنا العملى بتاعتنا"
ومشيوا الطلبة ...
ايمن"فاكرين لما قلتلكم فيه ناس بتقرالنا"
امل"انا فرحت اوى بكلامهم ده"
مازن"خسارة والله ان المادة دى خلصت"
ايمن"ما تيجوا نكمل"
مازن"نكمل ايه"
ايناس وامل ركزوا اوى مع كلام ايمن... بعد مافهموا فكرته
"احنا مش كنا بنعمل المجلة كل اسبوع...وكانت بتتعلق وسط مجلات تانية...احنا نعمل المجلة ونعلقها كل اسبوع برضه واهو يمكن تحقيق يضرب معانا زى بتاع الدكتور كده وكمان تدريب لينا"
مازن"موافق جداااا انا اصلا متضايق ان المجلة وقفت"
ايناس"ايه رايك ياامل"
امل"موافقة طبعا"
ايناس"تمام هنكمل بنفس اسم المجلة وبنفس الابواب ونفس اليوم علشان تبقى تكملة مش نبدا من جديد"
ايناس قاعدة مع عادل فى مكان بالليل
ايناس"عادل انا عايزة اتكلم معاك فى موضوع مهم"
عادل"اتكلمى يا حبيبتى"
ايناس"احنا هنفضل كده كتير"
عادل"كده ازاى"
ايناس"كده بنحب بعض فى السر حتى اصحابنا محدش يعرف حاجة"
عادل"ماانتى عارفة ليه مش عايز حد يعرف"
ايناس"طيب واهلنا"
عادل"مالهم اهلنا... كل حاجة لها وقتها"
ايناس"هنفضل كده بنخرج مع بعض وطول الليل بنتكلم ع الموبايل ولا ع النت
وكل يوم بحبك اكتر من اللى قبله وانت مقلتش هتتقدملى امتى"
عادل"هو ليه كل البنات همها الخطوبة والجواز مش الحب"
ايناس"ماهو الحب ده يبقى احلى لو قدام كل الناس"
عادل"بس زى ماانتى شايفة انا لسه فى الكلية هروح اقول ايه لاهلى واهلك... جوزونى بنتكم وانا لسه طالب"
ايناس"متاخدش كلامى بهزار يا عادل انا بقول مش بتجيبلى سيرة الخطوبة خالص وبعدين لو على الكلية انت كلها كام شهر وتتخرج"
عادل"ربنا يسهل طبعا...متقلقيش انتى بس كل اللى عايزاه هعملهولك"
ايناس"طيب يالا الساعة بقت 11كفاية كده"
عادل"مستعجلة ليه مش مامتك وباباكى بيرجعوا متأخر"
ايناس"معلش برضه كفاية لحد دلوقتى...تعالى اوصلك"
عادل"ماشى وصلينى لمازن"
وقاموا...وهما فى العربية كلم مازن فى التليفون
عادل"مازن انت فى البيت... معلش معلش اتأخرت شوية بس جايلك اهو.. قدامى ربع ساعة واكون عندك... سلام"
ايناس"انت كنت متفق مع مازن انك رايح له"
عادل"ايوه بس طبعا لما قعدت معاكى نسيت الدنيا"
ولما وصلوا عند بيت مازن نزل عادل وروحت ايناس
اول ما دخل عادل
مازن"اتاخرت كده ليه...كنت فين"
عادل"كنت فى مشوار كده مع بابا "
مازن"مش عربية ايناس دى اللى انت نازل منها"
عادل"اه"
مازن"وانت ايه علاقتك بيها"
عادل"علاقة ايه يابنى...قابلتنى صدفة وعرضت عليا توصلنى فوصلتنى وبعدين انت زعلان كده ليه"
مازن"انا عارفك كويس ياعادل ومفيش بنت بتحط عينك عليها الا وبتأذيها وايناس لأ"
عادل"بصرف النظر يعنى بس محموق عليها اوى كده ليه"
مازن"صاحبتى وخايف عليها"
عادل"اااااه صاحبتك ومخبى ليه"
مازن"مش الصحوبية اللى تقصدها... خليها اختى علشان اكون دقيق معاك"
عادل"متخافش متخافش دى صدفة وخلاص"
مازن"ماشى ياعادل بس خلى بالك واوعى تفكر تأذيها زى غيرها"
عادل"بقولك ايه انت هتقضى السهرة تتكلم على ايناس هانم هات السجاير بقى لما نلف بمزاج"
امل بتتكلم فى التليفون
امل"الجدول نزل ياايناس ولا لسه"
ايناس"لا لسه"
امل"طيب مش مهم نروح بكرة بقى علشان نذاكر شوية"
ايناس"احسن برضه خلاص السنة خلصت وكلها ايام ونخلص السنة دى"
امل"عايزين نجيب تقديرات زى التيرم الاول"
ايناس"ان شاءالله... انا هتصل بايمن ومازن واقولهم اننا هنشد بقى فى المذاكرة ومش هنروح كل يوم"
أمل"ماشى... ابقى سلمى عليهم واليوم اللى هتكونوا رايحين كلمونى اجى اشوفكم"
ايناس"ماشى ياامل... عايزاكى بقى تقسمى المواد علشان اذاكر زيك"
امل"خلاص بكرة ان شاءالله هكلمك واكون عملت جدول مذاكرة"
دخلت مامتها عليها وهى بتنهى المكالمة
الام"ايه ياامل بتذاكرى"
امل"ايوه ياماما...مالك"
الام"قلقانة وحاسة ان قلبى مقبوض... انا قلت لاخوكى ميسافرش بالليل"
امل"متقلقيش ... هتصلك بيه علشان تطمنى"
الام"ياختى انا عارفة فرح ايه اللى الفت صممت تروحه ده"
امل"ياستى سيبيهم يسافروا بدل ماكانت نكدت عليه لو قالها لأ"
واتصلت
امل"اهو بيرن اهو ياماما"
الام"هاتى هاتى"
وكملت بعد ما رد
الام"ازيك ياابراهيم... ايه انتوا فين؟؟ طيب مش تطمنى انكم وصلتم
بالسلامة... والفت والعيال كويسين... سلم عليهم... هتقعدوا كام يوم... ترجعوا بالسلامة ان شاءالله...اختك بتسلم عليك... مع السلامة"
امل"اطمنتى ياماما"
الام"اه الحمد لله"
وجت الام تخرج من الاوضة... قعدت على السرير... ومسكت قلبها
امل"ماما... مالك"
الام"مش قادرة.... ا ت ن ف س"
امل"ماماااا... مامااااااا"
ايناس بتكلم عادل فى التليفون
ايناس"لا مش رايحة بكرة... كالعادة قاعدة لوحدى... هذاكر شوية بس بعد مااكل لاحسن متغديتش لحد دلوقتى... اه غدا وعشا مع بعض... طلبت ديلفرى وزمانه على وصول... مفاجاة ايه... ثوانى اروح افتح الباب تقريبا بتاع الديلفرى جه"
وراحت ايناس تفتح الباب وعادل معاها ع التليفون
اتفاجئت بعادل هو اللى ع الباب
وقفت مبرقة عينيها وبتبص له وبتبص للتليفون
ايناس"ايه ده...انت"
دخل جوه البيت وقفل الباب وراه وهى ما زالت فى اندهاشها
ايناس"ايه اللى جابك ياعادل"
عادل"هى دى وحشتنى بتاعتك"
كان بيقرب منها وهى بترجع لورا
ايناس"وحشتنى طبعا...بس مينفعش تيجى هنا وانا لوحدى"
عادل"ماانا عارف انك لوحدك...وجيت علشان ابقى انا وانتى لوحدنا"[/size]
الرئيسية 
ً لك