[size=32]مازن تانى يوم فى المجلة... بيحكى لايمن وايناس المقابلة
ايناس"هههه امل اتخضت ياعينى"
مازن"لقيت خايف لاحسن تعمل اى رد فعل يبوظ الدنيا"
ايمن"امل ذكية واكيد فهمت لما قلت انها متعرفكش"
مازن"بس اخوها ذوق معايا ولا كأنه صعب ولا اى حاجة"
ايناس"هو اصلا عايز يخطبها لاى حد وخلاص"
مازن"ده اسمه ايه بتهزأينى بالذوق"
ايناس"ههههه والله ما اقصد يامازن ده انت حبيبى"
مازن"ماشى ياختى... روحى شوفى شغلك بقى خلينا نشوف ورانا ايه"
ايمن"انتوا بتهزروا وناسيين حاجة متفقناش عليها"
ردوا ايناس ومازن
"ايه"
ايمن"امل... هتقولولها الحقيقة ولا ايه"
ورد مازن بسرعة
"حقيقة ايه...وهو احنا بنكذب عليها"
ايمن"انا اقصد هى فاهمة سبب الخطوبة المفاجئة دى ولا افتكرتك رايح تخطبها علشانها هى"
وركزت ايناس نظراتها على مازن... وبدا مازن متردد
مازن"مش عارف هى فاهمة ايه"
سكتوا كلهم لحظات...بعدها رن موبايل مازن
وقبل ما يرد
"دى امل... الو ازيك ياامل... انا فى المجلة"
قامت ايناس وقفت جنب مازن وهو بيتكلم
"هات اكلمها...وحشتنى اوى"
ايمن"سلملى عليها كتير"
مازن"ايمن بيسلم عليكى وايناس عايزة تكلمك"
اخدت ايناس منه التليفون
ايناس"امولة حبيبتى وحشتينى... اخبارك ايه... اخوكى عامل ايه معاكى... يالا هانت من يوم السبت هترجعى لنا تانى بقى... احنا من غيرك مش حاسين بطعم اى حاجة خالص... ومبروك يا عروسة.. عايزة مازن..اهو معاكى"
ناولته التليفون... "هروح انا بقى اكمل شغل"
خرجت ايناس من المكتب...
مازن"قوليلى ياامل...عايزة ايه شبكة ولا هتجيبيها منين... لا انا معرفش الحاجات دى ..بصى ابقى اتكلمى مع مامتك وشوفى... هبقى اعدى عليكم يوم الخميس على الساعة 8 كده... اه صحيح كنت هنسى...طيب هتصرف ماشى هبقى اعرفك ان شاءالله مع السلامة"
بعد ماقفل معاها
مازن"ايمن... انا كنت ناسى حاجة مهمة"
ايمن"ايه هى"
مازن"احنا متفقناش مع مأذون"
ايمن"ههههههه "
مازن"انت بتضحك على ايه... تعرف حد"
ايمن"طبعا... بالليل واحنا مروحين هنروح نتفق مع المأذون اللى عندنا فى الحتة...انتوا هتكتبوا الكتاب فين"
مازن"فى البيت...هو فيه غيرى وغيرهم"
ايمن"واحنا يا ندل"
مازن"لاااا ...انتم مش هتظهروا غير لما يتم كتب الكتاب... مش
بعد اللى عملناه ده كله نروح نفضح نفسنا"
ايناس اول ما دخلت المكتب
ايهاب قاعد على مكتب امل..مكانه المؤقت
اول ما شافها داخلة
ايهاب"هو انتى نقلتى قعدتك معاهم هناك"
بصت له ايناس باستغراب
ايناس"نقلت ايه؟"
ايهاب"من ساعة ما جه مازن وانتى معاهم جوا... بقالكم ساعتين قاعدين مع بعض"
وردت عليه بكل ثبات
ايناس"وانت هتعد علينا بنقعد مع بعض قد ايه؟"
بص ايهاب فى الكمبيوتر اللى قدامه...وكمل شغل
ايهاب"مقصدش... انا اسف"
قعدت ايناس على مكتبها... وكل ما تشتغل شوية
تبص لايهاب... وتستغرب على كلامه معاها
اكتر من مرة...تلاقت نظراتهم
واول ما تيجى عينيهم فى عيون بعض... يبصوا فى الكمبيوتر
بعد شوية جه ايمن
ايمن"ايناس...انا نازل انا ومازن عندنا كام تقرير كده رايحين نعملهم وهنمشى من بره بره"
ومال عليها
"هنروح نتفق مع المأذون... العريس كان ناسى"
وانفجرت ايناس بالضحك... وظهر مازن على باب المكتب مستنى ايمن
ايناس وهى بتكمل ضحك
ايناس"هههههه ده انت عريس لبخة... تنسى المأذون"
اتكسف مازن وبص لايمن
مازن"ماشى ياعم ايمن... هى الفضيحة دى يتقالها حاجة...يالا انا مستنيك تحت"
كملت ايناس وهى واقعة من الضحك... بصوت عالى يوصل لمازن
ايناس"يا عريييييييييييييييييييس"
ايمن واقف بيضحك
ايمن"انا هنزله بقى... ده انتى صحيح فضيحة"
ايهاب... علامات البلاهه باينة عليه وهو مش فاهم حاجة
ايناس بتشتغل على الكمبيوتر وهى لسه مبتسمة من اثر الضحك
ايهاب"هو مازن عريس؟؟؟"
ايناس"اه... يوم الجمعة هيكتب كتابه على امل"
ايهاب"امل؟؟"
ايناس"امل شريكتنا الرابعة فى المجلة... انت نسيتها مش شفتها يوم حادثة مازن"
ايهاب"اه... وشفتها بعدها وانا بستلم الشغل كنتم انتم الاتنين موجودين"
ايناس"ايوه..هى دى"
ايهاب"وانتى"
ايناس"انا ايه"
ايهاب"من غير يعنى ما تتضايقى... انا كنت فاكر انتى ومازن.."
بصت له باستغراب ورفعت حواجبها
ايناس"اشمعنى يعنى... لا احنا اصحاب واخوات بس"
ابتسم ايهاب...ابتسامة واسعة جدااا
هى فى الاصل... ابتسامة فرحة واطمئنان
ايهاب"يعنى هو وامل... طيب عقبالك ان شاءالله"
ايناس"ميرسى"
كل واحد فيهم بيكمل شغله... نظراتهم بتتلاقى
كل ما نظراتهم تتلاقى... يتبادلوا ابتسامة سريعة وكل واحد يكمل شغله
مرت الايام وامل ومازن بينهم مكالمات بسيطة
اغلبها المتصلة امل
البيت عند امل كله فرحة واستعداد لكتب الكتاب
راح مازن فى المعاد... ونزلوا اشتروا الشبكة
وتانى يوم... تم كتب الكتاب فى البيت
تمت الاجراءات... وخلصوا... الساعة 9
الترحيب بمازن كبير
مازن"احنا هننزل انا وامل نتعشى بره"
ابراهيم"بس... احنا دلوقتى بالليل"
مازن"وهى هتخرج مع مين؟؟ مش مع جوزها"
اتفاجئ ابراهيم برد مازن... كان معتقد ان مازن هيسمع كلامه
مازن"جاهزة يا امل"
بصت امل لابراهيم ...مازن شافهم
مازن"انا قلت حاجة غلط ياابراهيم؟؟ مش الاصول برضه انى
جوزها وانى صاحب الكلمة عليها من دلوقتى ولا ايه"
ابراهيم"الكلام ده لما تتجوزوا"
مازن"تمام... احنا اتجوزنا خلاص... ولو تحب اخدها باللى عليها معنديش مشاكل... تحب نستنى لبعد الامتحانات ونعمل فرح براحتك"
سكت ابراهيم...وشه قلب ألوان... الام ساكتة
ألفت"فعلا يا ابراهيم...امل دلوقتى مسئولة من جوزها من كل حاجة سواء اهتمام او مصاريف "
فهم مازن تلميح ألفت
مازن"مظبوط يا مدام... امل دلوقتى مراتى يعنى محدش هيصرف عليها غيرى ولا حد كمان هيفرض رأيه عليها فى اى حاجة ...يعنى اى حاجة تخصها...ترجعلى انا بس فيها"
امل الفرحة بتنط من عينيها...هى عارفة مازن كويس
مستحيل يكون قصده هيتحكم فيها زى ابراهيم
اخيرا جه اللى هيخلصها من ابراهيم
مازن"هااا... بعد العشا اجيبها على هنا ولا اخدها على البيت"
ابراهيم متنرفز"بيت ايه؟؟ هو احنا هنرمى بنتنا من غير جهاز ولا عفش جديد... انت ليه بتغير كلامك"
مازن"انا مغيرتش كلامى...بس مش عايز حد يكون له كلمة على مراتى غيرى"
ابراهيم" ماشى يا مازن... مراتك بس هتحلفلى ع المصحف"
مازن مستغرب"على ايه"
ابراهيم"انك مش هتلمسها ولا تدخل عليها الا بعد الفرح ولما الناس كلها تعرف انكم اتجوزتم وبجهاز وعفش جديد زيها زى اى بنت"
مازن بعد ما حس بالانتصار على ابراهيم
مازن"احلفلك يا ابراهيم... وانا بقول مراتى فى المسئولية مش حاجة تانية"
نزلوا بعد ما ابراهيم اخد وعد من مازن
قعدت جنبه فى العربية... واول ما ساق
مازن"انا محضرلك حتة مفاجأة"
امل"انت اكبر مفاجأة بالنسبة لى يامازن"
مازن"انا ... ليه"
امل"اولا كل اللى حصل ده مش مصدقاه... ثانيا شخصيتك القوية دى على ابراهيم...انت خليته مش عارف يتكلم"
مازن"هههههه بذمتك مش يستاهل... بصى ياامل انتى من دلوقتى مفيش حد له حُكم عليكى...انتى حرة اعملى اللى انتى عايزاه... اتصرفى فى حياتك زى ما تحبى ... اخرجى وقت ماتحبى ... اشتغلى حققى حلمك... اكتبى اسمك فى وسط المصورين المحترفين بشغلك واجتهادك انتى متميزة ومحدش يقف فى طريقك"
امل مستغربة... ومازن رسم لها احلام وحطها على اول الطريق كمان انه خلصها من قيود ابراهيم
امل"انا بحبك اوى يامازن"
فرمل مازن فرملة قوية... من مفاجئة الكلمة
عمره ما فكر ان امل هتقوله كده... حب ايه؟؟ ده مكنش قصده
امل"فيه ايه"
مازن"مفيش انا بس اتهيألى انى شفت قطة بتعدى الشارع"
امل"لا مفيش حاجة... انا مشفتش اى قطط"
مازن"معلش معلش"
وكمل مازن سواقة وهو سرحان... هو مش عايز يخدعها
امل"ايه بقى المفاجأة اللى قلتلى عليها"
مازن"دقايق وهتعرفى"
امل فرحانة...باين فى نظرات عينيها... وصوتها وكل حاجة بتدل على فرحتها
ركن مازن فى جراج اوتيل فايف ستارز
امل"الله... احنا هنتعشى هنا...انا عمرى ماجيت مكان زى ده دى فعلا مفاجئة حلوة اوى"
مازن"المفاجئة لسه جوه"
مشيوا جنب بعض... ماشيين عادى
امل مستنية يمسك ايديها... بس ممسكهاش
سكتت واقنعت نفسها انه مكسوف
بعد خطوات.. افتكر مازن انهم عروسين
اخد ايديها وحطها فى دراعه
حس بفرحة امل وحبها...لما قربت منه وهما ماشيين
دخلوا المطعم.... وشاور مازن على ترابيزة
"المفاجئة اهى"
شافت ايناس وايمن وشروق قاعدين مستنيينهم
راحوا ناحيتهم... قاموا كلهم يسلموا عليهم
ايناس هتتنطط من فرحتها بأمل... شروق وايمن كمان فرحوا انهم شافوا امل
بعد السلام والمباركات وطلب العشاء
ايمن ملاحظ ان مازن مش طبيعى...ومش عارف يكلمه لانه قاعد قدامه...وكل واحد جنب خطيبته وايناس على طرف بينهم
ايمن"ماتيجى يامازن معايا نشوف حاجة هنا بس"
مازن فهم ان ايمن عايزه...قام
شروق"حاجة ايه"
ايمن"مفيش شفنا واحد نعرفه هنتاكد بس هو ولا مش هو"
مشيوا مازن وايمن...قامت ايناس قعدت جنب امل
ايناس"مبروك ياامولة... خلاص بقى طبعا من بكرة انتى معانا فى الكلية والمجلة من غير حصار"
امل"ان شاءالله..ده مازن ده طلع حكاية تصدقى خلا ابراهيم مش عارف ينطق معاه ولا كلمة"
ايناس"مازن راجل يا بنتى اومال ايه"
امل"اه ياايناس... مكنتش اعرف انه بيحبنى وانا لقيت نفسى بحبه اوى"
ابتسمت ايناس ابتسامة صغيرة...لانها مش عارفة ترد
ايمن ومازن راحوا الحمام
ايمن"مالك يا مازن شكلك سرحان ولا بتفكر فى حاجة"
حكى له مازن كا اللى حصل...وجملة امل الاخيرة
مازن"انا كل احساسى بيها... صديقة جدعة بس"
ايمن"وبعدين...اهو ده اللى كنت عامل حسابه... هتسكت وتبقى بتخدعها ولا تقولها وتصدمها"
[/size]
الرئيسية 
