[size=32]مازن بعد ما شاف النتيجة
اتصل بمامته بسرعة
مازن"ماما... انا نجحت"
الام"بجد يامازن... مبروك"
مازن"الله يبارك فيكى ياماما...انتوا وحشتونى اوى... جايين امتى"
الام"قريب ياحبيبى هبقى اكيد اتصل بيك لما اعرف اليوم بالظبط"
مازن"ماشى ياماما تيجوا بالسلامة"
وشاف ايمن وهو بينهى مكالمته
"ااااااايمن"
وسلموا على بعض
مازن"ايه الاخبار عملت ايه"
ايمن"تمام الحمدلله وانت يامازن عملت ايه"
مازن"الحمدلله والبركة فيك"
ايمن"لا متقولش كده... مبروك"
مازن"ومبروك عليك انت كمان"
ايمن"الله يبارك فيك...يالا اسيبك انا علشان ورايا شغل"
مازن"ماشى ابقى خلينى اشوفك"
ايمن"ان شاءالله... سلام"
امل اول ما بتفتح باب بيتها... جت فى وشها كورة
امل"آى... كده يامصطفى"
وجرى مصطفى...وجت مامتها عليها
الام"ايه الاخبار عملتى ايه"
امل"نجحت الحمدلله ياماما... هو مصطفى هنا لوحده"
مالت عليها مامتها وقالت بشويش
"مرات اخوكى نايمة جوه "
امل"هما جم امتى"
الام"من شوية اخوكى بيقول هيقعدوا كام يوم لانها مش قادرة على العيلين مع بعض"
امل"وهى حد قالها تخلف كده ورا بعض... واحد عنده سنة ونص والتانى كام شهر واحنا اللى نخدم"
الام"اسكتى لتسمعك وتبقى حكاية"
امل"اففففف"
الام"ادخلى غيرى هدومك وتعالى ساعدينى فى المطبخ انا عينى بقت فى وسط راسى من مصطفى وشقاوته"
امل"هى نايمة فى انهى اوضة"
الام"فى اوضتى"
وسابتها مامتها ودخلت المطبخ... ودخلت امل اوضتها
وهما الاتنين فى المطبخ... سمعوا صوت حاجة بتتكسر
جروا بسرعة على الانتريه
لقوا مصطفى كسر موباية المياه اللى كانت محطوطة على الترابيزة
مصطفى واقف حافى وسط القزاز الكسور
امل"اقف مكانك يا مصطفى متتحركش"
مصطفى عيط... خرجت الفت من الاوضة
"الفت"فى ايه؟...بتزعقيله كده ليه"
امل"خايفة عليه من القزاز المكسور لاحسن يدخل فى رجله"
جريت الفت على مصطفى وشالته
الفت"يعنى انتوا الاتنين مش عارفين تخلوا بالكوا عليه شوية صغيرين ارتاح فيهم شوية... وكمان بتزعقيله ياست امل"
الام"الحكاية مش مستاهلة كل ده يا الفت امل مغلطتش"
الفت"طبعا لازم تدافعى عن بنتك"
واخدت مصطفى وخلت الاوضة وقفلت عليها
وامل ومامتها واقفين يبصوا لبعض
الام"هاتى حاجة ياامل لمى بيها القزاز ده"
امل"انتى هتسكتى لها"
الام"اعملها ايه اروح اضربها يعنى"
امل"هى بتتأمر على ايه... هى فاكرانا خدامينها"
الام"عيب كده ياامل هو احنا لما نخلى بالنا من ابن اخوكى ولا نساعد مراته نبقى خدامين"
امل"هى بتعاملنا على الاساس ده"
واتفتح الباب ودخل ابراهيم من بره
ابرهيم"السلام عليكم"
ردوا الاتنين" وعليكم السلام"
ودخلت امل المطبخ تجيب حاجة تلم بيها القزاز... ورجعت تانى
كان ابراهيم دخل الاوضة
وسمعوا صوت عياط
الفت"احنا لازم نمشى من هنا... اختك مش طايقة مصطفى ولقيتها بتزعقله"
وخرج ابراهيم بسرعة من الاوضة... والفت وقفت وراه
ابراهيم"اممممممل.... انتى ازاى تزعقى لعيل صغير"
امل"انا مزعقتلوش بالمعنى ده انا كنت بقوله يقف مكانه ميتحركش علشان ميتعورش من القزاز اللى فى الارض"
ابراهيم"تقوليهاله بالراحة مش بصوت عالى يخوفه"
"انا معملتش حاجة تستاهل كل ده"
الفت"يعنى انا كذابة مثلا"
امل"لا مش كذابة بس مقلتيش الحكاية زى ماحصلت بالظبط"
الفت"اتفضل اختك بتشتمنى وانت واقف"
الام"لا بقى يا الفت هى لا شتمتك ولا غلطت فيكى"
الفت"يالا ياابراهيم...بقولك محدش طايقنا هنا"
ابراهيم وهو بيقول لالفت
"احنا نيجى هنا ونقعد براحتنا... دى بيت ابويا يعنى بيتِك وانتى ياالفت ليكى هنا اكتر ما امل ليها... امل ضيفة هنا لحد ماتمشى بالسلامة لبيت جوزها
وبص لامل وهو بيكمل
ولحد ماتمشى من هنا لازم متغلطيش فى مراتى ولا تزعلى حد من ولادى تانى"
راحت ايناس المستشفى لمامتها علشان تفرحها
لقيتها فى العمليات... قعدت تستنى... تستنى
لحد ما زهقت ومشيت... راحت لمنى اختها
منى"اهلا يا ايناس...تعالى ايه المفاجئة الحلوة دى"
دخلوا وقعدوا مع بعض
ايناس"ازيك يامنى... انا قلت اجى اقضى اليوم معاكى واهو نرجع ايام زمان تانى"
منى"تنورى ياحبيبتى... جبتى النتيجة"
ايناس"اه الحمدلله... ومحدش سألنى غيرك حتى بابا وماما مش على بالهم"
منى"مالك ياايناس بتتكلمى بحزن كده ليه"
ايناس"من يوم مااتجوزتى وانا بقيت لوحدى خالص بابا وماما مش فاضيين لى
خالص كل حاجة شغلهم بس وانا اتنخقت من الوحدة"
منى"طيب ماتيجى تقعدى معايا كام يوم"
ايناس"مش عايزة اضايقكم"
"يابنتى تضايقينا ايه بس... زى ماانتى عارفة حسن فى شغله طول اليوم وبيرجع بعد المغرب وكتير بينزل تانى ..تعالى واهو تغيرى جو ونسلى بعض
زى زمان"
وبعد تفكير لدقايق
ايناس"طيب... هروح اجيب هدوم م البيت واجى اقعد عندك شوية "
منى"طيب يا حبيبتى... هستناكى"
قامت ايناس نزلت.... ومسافة السكة ورجعت تانى لاختها
وهما قاعدين وفى معاده المعتاد... جه حسن
ولما وصل اتغدوا كلهم مع بعض
حسن"منورة ياايناس"
ايناس"ميرسى يا حسن"
منى"انا فرحانة اوى انك هتقعدى معايا هنا...تصدق ياحسن ماما وبابا سايبينها على طول لوحدها"
حسن"معلش علشان شغلهم... خليكى قاعدة معانا على طول"
ايناس"ربنا يخليك...مش للدرجة دى"
حسن"انا بتكلم بجد على فكرة مش بعزم وخلاص... ايه رايك يامنى"
منى"ياريت والله واهو لا انا ازهق من القعدة لوحدى ولا انتى تزهقى من القعدة لوحدك"
ايناس"ربنا يخليكم..كام يوم كده كفاية اوى"
حسن"اتصرفى بقى يامنى مع اختك انا مليش دعوة"
مازن وعادل فى عربية مازن وهى راكنة فى شارع ضلمة ... وبيدخنوا
عادل"القعدة عندك فى البيت ليها طعم تانى"
مازن"هنعمل ايه بس... طول ما بابا وماما فى مصر مينفعش نشرب فى البيت"
عادل"وهيمشوا امتى"
مازن"خلاص ياعم الدراسة هتبدأ الاسبوع الجاى وهما مسافرين كمان 4 ايام"
عادل"احسن"
وكملوا تدخين وهما فى دنيا تانية
ايناس نايمة...صحيت على خبط الباب
بصت فى الساعة اللى قدامها... كانت 11 الصبح
استغربت مين جاى فى المعاد ده
قامت... بصت من العين...شافت حسن
وقفت لحظات وهى بتقول لنفسها
"ايه جايبه دلوقتى لوحده وهو عارف ان مفيش حد فى البيت"[/size]
الرئيسية 
